Foi o primeiro arquiveiro do Arquivo Xeral e Público de Galicia. Agora, a coincidir coa celebración o día 9 do día dedicado a estas entidades, o Arquivo de Galicia abriu unha exposición para reivindicar a súa figura. Vicente Álvarez de Neira, arquiveiro (1717-1784) amosa 26 documentos e varios obxectos do homenaxeado, ao tempo que propón un percorrido biográfico pola súa figura "con especial incidencia na súa participación directa nalgúns feitos históricos desde a súa condición de avogado, asesor de varias institucións, tenente de corrixidor da Coruña, deputado e arquiveiro", segundo explica a presentación do proxecto. A exposición poderá verse nas instalacións da Cidade da Cultura ata o vindeiro 7 de setembro.
