O Día das Artes que se lle dedicou este ano a Maruja Mallo serve de base para a grande exposición que o Museo Provincial de Lugo centra na artista e que abre hoxe as súas portas. Maruja Mallo. Vinte almas amosa unha selección de obras desta creadora presentes en coleccións públicas e privadas galegas. Ademais, establécese unha relación entre o seu traballo e doutros coetános, coa presenza de traballos de Alberto Sánchez, Benjamin Palencia, Vlady Serge, José Caballero, Pablo Picasso, Antonio Rodríguez Luna, Juan Ismael e Joan Miró. Eugenio Granell conta tamén cun espazo destacado no proxecto con varias pezas que realizou en homenaxe á propia Mallo. A exposición complétase cun amplo apartado documental sobre a pintora e con pezas de Montse Rego, Renata Otero, Félix Fernández e David Catá, artistas contemporáneos orixinarios de Viveiro, ao igual que a artista. A exposición poderá verse ata o vindeiro 3 de setembro.
