Juan Luís Saco é o novo presidente da Fundación Otero Pedrayo

O Padroado da Fundación Otero Pedrayo escolleu o pasado sábado 22 de abril a Juan Luís Saco como novo presidente desta entidade. Saco, orixinario de Ourense e catedrático de Latín, facía xa parte da executiva da institución e estivo vencellado desde a súa infancia á figura de Otero como o seu alumno no bacharelato e na universidade. O novo presidente substitúe a Victor F. Freixanes, a quen o padroado acordou nomear Presidente de Honra da entidade. Como principais retos para a nova etapa, o presidente entrante apunta a preocupación polo estado económico da Fundación, e sinala que se inicia unha fase de transición co proceso de atualización dos estatutos. A maiores, o padroado acordou iniciar unha liña de traballo co obxectivo de recuperar o xardín e a contorna da Casa Grande de Cimedevila, para o que contará co apoio da Consellería de Cultura e da Dirección Xeral de Patrimonio Histórico. De xeito máis inmediato, en vindeiros días farase público o fallo do Premio Trasalba deste ano.