Ourense acollerá 30 compañías de teatro na XXII MITEU

O Auditorio, o Teatro Principal, o Campus universitario, o Liceo e as rúas de Ourense acollerán entre o 20 de abril e o 6 de maio as actuacións da XXII Mostra Internacional de Teatro Universitario (MITEU). Un total de 30 compañías de España, Portugal, Costa de Marfil, Irak, Suecia, Holanda e Colombia participan no encontro, que presentou onte o seu programa. No mesmo destaca o apartado As voces acaladas, no que se encontra a montaxe de Al Salam Group of Modern Art, de Irak, que porá en escena Children of war, a colombiana Carolina Torres, que abordará a situación das mulleres dos sicarios en Mi parce e os marfileños Bin Kadi So, que reinterpretarán a historia de Xoana de Arco. Canda a eles, danse cita na cidade das burgas Pablo Carbonell, Clownic (Tricicle) e mais un concerto do catalán Albert Plá, ademais de grupos de teatro universitarios de Lugo, Ourense, Madrid, Compostela, A Coruña, Burgos, Estremadura e Almería.