O xurado da XVII edición dos Premios COAG de arquitectura deu a coñecer na rede as propostas finalistas destes galardóns. En total, 34 obras optan a se facer cun premio aos mellores traballos nas categorías de vivenda, rehabilitación, equipamento, deseño urbano, interiorismo, baixo custo, divulgaicón e proxecto fin de carreira. A selección realizouse entre un total de 158 propostas visadas, e finalizadas entre o 31 de xullo de 2014 e a mesma data de 2016, e quedaron desertas as categorías de arquitectura novel e de arquitecturas efémeras. As propostas gañadoras daranse a coñecer durante a entrega de premios do 17 de marzo no Teatro Principal de Ourense.
O xurado, composto por Antonio Maroño, Inês da Silva, Guadalupe Piñera, Fernando Agrasar, Cristóbal Crespo e José Luis Sanmiguel Guerreiro, acordou tamén outorgar a Xosé Xavier Suances Pereiro, o premio COAG na categoría especial a toda a traxectoria profesional, "en recoñecemento ao seu exercicio profesional e con motivo da súa dilatada experiencia como colexiado".
