A Academia Galega de Ciencias incorporará catro membros en 2017

O compostelán Pazo de San Roque acollía onte a apertura do curso académico da Real Academia Galega de Ciencias(RAGC). Ademais de entregar os Premios de Investigación Ernesto Vieitez 2016, no evento o Académico Pedro Merino pronunciou a lección inaugural do novo curso académico co título “Materiais avanzados para a enxeñaría: Dos micro aos nanoestruturados” e repasáronse as actividades desta entidade ao longo de 2016. Como novidade, o presidente da RAGC, Miguel Ángel Ríos, anunciou a catro incorporacións que a entidade prevé realizar este ano. Segundo revelou, o arquitecto Manuel Gallego Jorreto, o sociólogo da UDC Antón Álvarez Sousa, o químico da USC especialista en nanomateriais Arturo López Quintela e o físico da USC José Rivas, especialista nos aspectos magnéticos dos nanomateriais, pasarán a ser membros da Academia ao longo dos vindeiros meses.