Cantos na Maré homenaxeará a Narf

Fran Pérez 'Narf' seguirá presente no Cantos na Maré, o Festival Internacional da Lusofonía no que tantas veces participou. A edición que se celebrará o vindeiro 14 de xaneiro no Pazo da Cultura de Pontevedra farase en homenaxe ao músico recentemente falecido. Onte rpesentouse en Pontevedra o programa da décimo terceira edición, unha das primeiras grandfes citas musicais do ano. A homenaxe a ‘Narf’ e a música de Guadi Galego xunto coa do guineano Manecas Costa, a do angolano Paulo Flores, a da portuguesa Celina da Piedade e a da brasileira Kátya Teixeira centrarán esta edición do evento. A directora artística de Cantos na Maré, a cantante Uxía, detallou na presentación o contido do festival promovido cada ano pola empresa Nordesía e que conta, entre outros, cos apoios da Xunta de Galicia, do Concello de Pontevedra e da Deputación Provincial. O Diorecto de AGADIC, Jacobo Sutil, recordou a figura de Narf "músico galego sen fronteiras que ben pode ser o símbolo de Cantos na Maré, por canto toda a súa carreira tivo de xenerosidade musical e de alento positivo a través da crenza firme na música como lugar común, feliz e posible, por riba dos territorios", expresou.

Ademais da propia Uxía, coa que Narf tivo compartido gran cantidade de proxectos musicais, participará nesta vindeira edición de Cantos na Maré, Manecas Costa, con quen o músico e compositor compostelán editou o celebrado traballo ‘Aló Irmão’ en 2009 e que é tamén parte importante desa comunidade musical que preside a filosofía do festival desde a súa primeira participación nel en 2005. Outra das protagonistas será Guadi Galego, unha das nosas grandes vocalistas galegas, quen representa neste momento un dos camiños máis arriscados na evolución da música galega de raíz cara a novos territorios, e consegue xuntar na súa figura artística a consagración e o valor do novo. De feito, chega a Cantos na Maré cargada con novas músicas procedentes do seu recentemente estreado álbum, ‘O mundo está parado’; e sostendo aínda o Premio Martín Códax da Música 2016 á mellor artista na categoría de canción de autor polo seu anterior traballo ‘Lúas de outubro e agosto’. Os cinco artistas estarán acompañados por unha banda dirixida por Paulo Borges (director musical), coa presenza tamén no escenario de Uxía e doutro convidado aínda sen desvelar e que será anunciado nos vindeiros días.