O Festival Agrogay da Ulloa leva o Premio do Público do Culturgal

As votacións populares outorgárolle, por unha estreita marxe, o Premio do Público do Culturgal deste ano ao Festival Agrogay da Ulloa. O evento que celebrou este mes de agosto a súa súa terceira edición en Cumbraos, Monterroso, conseguiu 2.153 votos, só catro máis que o seguinte finalista en liza, a cooperativa NUMAX, que ficou con 2.149. A maior distancia ficou a terceira proposta, o portal GCiencia, que obtivo 1.229 apoios. O Festival Agrogay naceu coa intención de "dar maior visibilidade e reivindicar a diversidade afectiva, sexual e vital no rural, dinamizar e axitar culturalmente a comarca, así como organizarse para dignificar e recuperar a vida nas aldeas a través do respecto ás tradicións e do impulso de lazos cooperativos". Os representantes da organización recollerán o galardón o vindeiro domingo 4 de decembro nun acto que se celebrará ás 18 horas no marco do Culturgal.





O Premio do Público Culturgal naceu en 2013 coa intención de recoñecer "proxectos destacados e relevantes para a sociedade e vinculados á cultura galega", cunha especial atención a "propostas novidosas, con proxección de futuro, transversais e asociativas, que se relacionen directamente coa sociedade civil e fomenten a súa implicación". Segundo explicou a organización da feira, nesta edición seleccionáronse como finalistas "tres candidaturas ``mozas´´ cun sólido percorrido e perspectivas de futuro".