Falece a actriz Dorotea Bárcena

A pasada noite falecía, aos 72 anos de idade, a actriz Dorotea Bárcena. Coñecida polo grande público polas súas participacións televisivas en programas como O show dos Tonechos, onde interpretaba a Amadora, desenvolveu unha intensa carreira tanto teatral como audiovisual, que lle valeu facerse cun premio honorífico María Casares en 2006 e a levou mesmo a dirixir en 1988 o Centro Drmático Galego, entidade coa que participou en diferentes producións. No seu currículo atópanse fitos como a súa colaboración na posta en marcha de Esperpento Teatro Xove nos anos setenta, de Teatro da Lúa no 87 ou o seu labor como directora en producións como Follas Novas ou Las bicicletas. Como actriz traballou en proxectos como Martes de Carnaval, co Centro Dramático Nacional, os filmes Divinas palabras, Os mortos van á presa ou Lobos de arga e multitude de montaxes teatrais con títulos como Agasallo de sombras de Vidal Bolaño ou Xelmírez ou a Gloria de Compostela, de Daniel Cortezón. O tanatorio compostelán de Boisaca acolle ao longo do día de hoxe os seus restos mortais.

A Asociación de Actores e Actrices de Galicia (AAAG) emitiu un comunicado no que amosa "o seu pesar polo falecemento da actriz Dorotea Bárcena". Para a Xunta Directiva da AAAG, Bárcena representaba “un referente artístico e persoal tanto para a súa xeración, que foi a que puxo en pé o teatro profesional ao longo dos anos setenta, como para as que viñeron despois e seguiron a construír a escena do noso país”. Do mesmo xeito, apuntan que a falecida foi, “ademais de pioneira e referente, un exemplo rotundo para as profesionais do sector, ao ter aberto camiños laborais e por se converter na primeira muller que dirixiu o Centro Dramático Galego".