A sede da RAG acollerá o Simposio Manuel María

O habitual simposio que a Real Academia Galega lle dedica ao autor homenaxeado no Día das Letras Galegas celebrarase nesta ocasión na sede da institución na Coruña. Entre os vindeiros 22 e 24 de novembro diferentes investigadores abordarán as múltiples facetas de Manuel María. Segundo anuncia a RAG, será Darío Xohán Cabana o responsable de abrir este encontro, e acompañarano na primeira sesión Marta Dacosta, Manuel López Foxo e Rosalía Fernández Rial nunha mesa redonda sobre a poesía do autor. Un recital a cargo de Marica Campo, Rosalía Fernández Rial, Marta Dacosta, Cesáreo Sánchez e Xulio López Valcárcel fecha o programa da xornada.


No mércores 23 intervirán Camilo Gómez Torres, Henrique Rabuñal, Montse Penas e Xurxo Souto, e haberá unha mesa redonda centrada na narrativa e na obra xornalística do Chairego, a cargo de Mercedes Queixas, Carmen Fernández-Pérez Sanjulián e Xosé Ramón Freixeiro Mato. A última xornada abordará a relación entre poesía e política na obra do autor nunha mesa que contará con Xosé Estévez, Pilar García Negro e Carlos Quiroga. Antón Lopo, Xosé Lois García e Fina Casalderrey farán cadansúa intervención para rematar coa proxección do documental Eu son fala e terra desta miña terra.