O Día da Ciencia en Galego lembra a Mendel e a Cruz Gallástegui

Hoxe, catro de novembro, celébrase en todo o país o VII Día da Ciencia en Galego. Esta cita, que coordina a Institución Galega de Ciencia, homenaxea este ano a Mendel, descubridor das leis de herdanza de caracteres e mais a Cruz Gallástegui, fundador da Misión Biolóxica de Galicia. Precisamente o Parlamento de Galicia realiza esta mesma mañá un acto de homenaxe a este veterinario e investigador. De xeito paralelo, as Bibliotecas da Xunta de Galicia desenvolven este mes un intenso programa de actividades orientadas á divulgación científica. Obradoiros, conferencias, contacontos, demostracións de novas tecnoloxías ou espectáculos de maxia fan parte dun programa que chega tamén ás bibliotecas escolares do país. A arquitecta Isabel Aguirre de Urcola, foi a científica convidada este ano para a elaboración do Manifesto a favor da ciencia en galego nas bibliotecas.