O proxecto Muro de Medeiros explora as relacións entre patrimonio e empresa en Monterrei

O Muro de Medeiros é un sitio arqueolóxico ubicado na parroquia de Medeiros (Monterrei). Trátase dun castro pequeno, pero que destaca polas súas impresionantes defensas en pedra e pola especial concentración de lagares rupestres que se dá nas terrazas do castro ou inmediatamente ao seu carón. A partir da alianza entre a comunidade de montes de Medeiros, o concello de Monterrei, que é a entidade promotora, e a adega Martín Códax, o castro recuperarase desde un enfoque orientado á súa rehabilitación pero tamén para o estudo da presenza do viño na comarca de Monterrei. A maiores, a adega Martín Códax, patrocinadora do proxecto, produciu o viño Mara Moura, un godello que difunde a singular lenda do castro do Muro da Cidade, na que unha moura agasalla coa pranta do viño aos veciños, aproveitando a tradición oral para os seus produtos.