Selo de certificación de calidade para a Libraría Trama

A libraría Trama de Lugo ven de ser recoñecida co distintivo Librerías de Calidad do Ministerio de Educación, Cultura e Deporte. O Comité de Certificación do Ministerio outorgoulle este distintivo creado dentro das accións do Plan Integral de Fomento da Lectura ao ter demostrado Trama que cumpre cos estándares de calidade establecidos por este programa seguindo un minucioso proceso de certificación. A libraría lucense, que este ano celebra 19 anos de actividade, é a única de Galicia arestora e un dos 28 sitios do Estado que pode presumir deste selo para cuxa obtención resulta necesario demostrar ante unha auditoría que se cumpren cunha serie de requisitos relacionados coa actividade da libraría, a súa xestión, instalacións e persoal, e cuestións relacionadas coa cultura e calidade como organizar un mínimo de seis eventos culturais ao ano.

O selo, que certifica ante terceiros a excelencia do establecemento, esixe entre outros detalles, que a oferta editorial da librería non estea condicionada por ningún distribuidor, que conte cunhas existencias mínimas de 6.000 referencias distintas no caso de librerías xeralistas e que dispoña de libros de a lo menos 50 selos editoriais diferentes. As librarías co selo de calidade deben dispor de servizo de envío a domicilio de produtos e ter páxina web, bitácora ou estar presente en redes sociais de forma activa. Así mesmo opara obter esta certificación que a librería Trama xa pode colocar de forma visible debe contar cun medio de prescrición escrita de libros e cun sistema para recoller suxestións por parte dos clientes e o seu propio persoal.