Galicia Escena Pro medra ata as 37 compañías

O mercado das artes escénicas Galicia Escena Pro sofre unha grande medra na primeira edición que celebra no mes de xuño. En total participarán no evento, que se desenvolve entre o 6 e o 9 de xuño en Compostela, 37 compañías, trece máis do que na última edición. O programa prevé 17 espectáculos en formato completo e 10 en formato reducido aos que se suman outras dez obras que se presentarán en formato de pitching ou adianto para programadores. O mercado conta con esta ocasión coa presenza de tres compañías vascas que participan da man dunha colaboración co Instituto Etxepare.

O Auditorio Abanca, a Fundación SGAE, o Salón Teatro e o Teatro Principal acollerán as diferentes representacións desta edición do mercado. As obras que se poderán ver completas son A forma das cousas, de La Yogurtera; Coma e punto, de Antagonista Teatro; Contiguo, de Compañía IO; Eroski Paraíso, de Chévere; Foucellas, de Talía Teatro; Gretel e Bela, de Teatro da Semente; Manawee, de Matrioshka Teatro; O conto da Azuzaina, de Limiar Teatro; O poder de Amabel, de Pérez&Fernández; Os amores de Jacques o fatalista, de Producións Teatráis Excéntricas; Os reloxos preguiceiros de Néboa, de Aporía Escénica; Raclette, de Ibuprofeno Teatro; Son, de Nova Galega de Danza; e Up2Down’m de trasPediante.