O noiés Francisco Pérez Villanueva "Quico" impúxose na XIII edición do Premio Pura e Dora Vázquez de Ilustración. As súas propostas para iluminar o texto gañador do certame homónimo de narrativa foron seleccionadas polo xurado debido á súa "orixinalidade e creatividade especiais" e a que "denotan unha grande imaxinación do autor e ademais teñen unha grande calidade artística, cunhas tonalidades moi agradables á vista e que combinan moi ben coa historia que ilustra". O libro de Montserrat Pis Marcos, titulado Dos estranos ollos de Damaluar e das aventuras que lle sucederon o día que desapareceron as súas zapatillas sairá publicado coas ilustracións de Quico, quen ademais recibirá un premio de 1.500 euros en metálico.
