A Sala Mozart do Auditorio de Galicia en Compostela acolle, onte e hoxe, Gute Nacht, unha proposta escénica na que o creador e performer Gonzalo Vázquez mestura canto lírico, piano e danza contemporánea. Poemas de Wilhelm Müller musicados por Franz Schubert serven de base para explorar "o tema do amor desde o ángulo da morte como experiencia vital e creadora". A iniciativa intégrase no festival son[UT]opías 2015/2016 do proxecto campUSCulturae.
Pola súa banda, o Teatro Principal será escenario da estrea, este sábado 30, de Ulises e a nena durmida. Ánxela Blanco dirixe e executa unha montaxe na que mestura teatro e danza contemporánea a reinterpretar o retorno de Ulises a Itaca logo da guerra de Troia.
