Paula Quintas e Marta Alonso protagonizan a última montaxe da compañía Traspediante. Up2Down preséntase esta tarde ao Salón Teatro de Compostela e fecha a programación de 2015 da sala. A montaxe que dirixe Arturo Cobas e conta con dramaturxia de Kirenia C. Martínez Acosta, mestura diferentes disciplinas e fusiona danza con circo e funanbulismo. Segundo explica a presentación do proxecto, "a proposta parte do inicio dun ‘show’, no que aparecen dúas personaxes surrealistas e os seus obstáculos, contextualizan o momento no que os desexos e as aspiracións de cada unha se atopan e inician unha viaxe emocional ata chegar ao entendemento". O proxecto conta con música orixinal de María Mendoza.
