A danza chega ás programacións da Coruña e de Carballo

Comeza abril cos pés inquedos. O Teatro Rosalía de Castro bota a andar, xa o día 1, a nova edición do seu ciclo TRC Danza, que achegará ata o vindeiro mes de novembro doce propostas profesionais desta arte, das cales tres serán galegas. Invisible Wires, unha coprodución entre Galicia e Alemaña da compañía galega La Macana abre o programa e é unha das dúas estreas que se achegan ao ciclo. A outra será a montaxe Son, de Nova Galega de Danza, que sairá ás táboas o 27 de maio. A compañía portuguesa Circolando protagonizará a actuación do 29 de abril, Día Internacional da Danza, con Horas.

Pola súa banda, Carballo abre o día 2 o programa do XIV Primavera enDanza. Catro compañías galegas e unha catalá actuarán na vila ata o día 22 de abril, nun programa que integra tamén obradoiros, coloquios e unha exposición. O ciclo conta, ao igual que A Coruña, con La Macana, á que se suman Airenoar, Javier Martín, Traspediante e Mar Gómez.