LED, Lugo en Danza é o título do novo ciclo dedicado ás artes do movemento que bota a andar este 9 de xaneiro na Cidade da Muralla. Unha clase maxistral a cargo de Janet Novás inicia un programa que se prolongará ata o vindeiro mes de maio e que coordina Cris Vilariño. A propia Novás abre a programación de espectáculos coa representación o día 10 de Mercedes máis eu no auditorio Gustavo Freire ás 20:30 horas.
Traspediante con Up2Down o 7 de febreiro e tres pezas curtas a cargo de Beatriz del Monte, o Colectivo Glovo e Alba Cotelo continuarán o 7 de marzo coa proposta. Para o mes de abril fican as propostas de Diego M. Buceta e Nova Galega de Danza, mentres en maio será Andrés Corchero o responsable de fechar o ciclo.
