A Xunta presenta a súa memoria de actividades de cultura 2015

A Cidade da Cultura de Galicia acollía esta mañá a presentación da Memoria de actividades de Cultura da Xunta de Galicia 2015, un documento no que se recollen as actuacións que desenvolveu goberno galego nesta materia ao longo da última anualidade. Román Rodríguez, conselleiro de Cultura, destacou como fitos destes período a elaboración do anteproxecto da Lei do Patrimonio Cultural e mais os avances cara á eliminación da fenda dixital. Como obxectivos prioritarios, Rodríguez apuntou "a democratización da cultura no marco dunha sociedade inclusiva, dentro da Estratexia galega sobre discapacidade 2015-2020 e a internacionalización das industrias culturais galegas".



Outros feitos destacables que recolle o documento sobre este período inclúen o desenvolvemento da nova plataforma de préstamo de libro electrónico GaliciaLe e mais da libraría dixital da Xunta de Galicia. O recoñecemento da UNESCO para os Camiños do Norte, a exposición dedicada a O primeiro Picasso ou a que sobre o fotógrafo José Suárez se puido ver na Cidade da Cultura son tamén aspectos que destaca a Xunta de 2015. No campo da internacionalización, Rodríguez apuntou a vindeira celebración da feira Womex en Santiago de Compostela e a presenza de Compostela como cidade convidada á Feira do Libro de Bos Aires. O documento complétase con dous anexos que detallan a a estrutura da Consellaría e a relación das convocatorias realizadas polo departamento de Cultura e Educación.