Abre Con-Fío en Galicia, a grande exposición do Gaiás para este ano

O Museo Centro Gaiás da Cidade da Cultura abre hoxe Con-Fío en Galicia, a grande aposta expositiva do complexo para este ano. Ata o vindeiro 11 de setembro poderá verse esta iniciatia que comisaría Miguel Anxo Seixas e que pretende "render homenaxe a un sector que conseguiu situar Galicia nun lugar de referencia no panorama internacional". A mostra percorre a través de 300 pezas a eclosión que se viviu nos anos 80 con firmas como Adolfo Domínguez, Roberto Verino, Antonio Pernas, Florentino ou Caramelo e o fenómeno Inditex. Canda a eles poden verse creacións de deseñadores actuais como Sara Coleman, Eva Soto ou José Castro. Ademais, amósase a historia do sector desde a Prehistoria, cos inicios da industria téxtil e fitos destacados deste ámbito. A montaxe abre ao público esta mesma tarde, ás 16 horas, e a entrada á mostra será de balde durante todo o período de actividade.