Multitude de eventos conmemoran o Día de Rosalía

Centros de ensino, asociacións ou, como non, a Fundación que leva o nome da autora conmemoran hoxe o Día de Rosalía. O aniversario do nacemento da poeta está a motivar múltiples actividades por todo o país, desde o recital de Amancio Prada que organiza esta tarde a Real Academia Galega ao emprego masivo da etiqueta #MobilizaRosalía nas redes sociais, impulsada pola Asociación de Escritores. Entre as últimas incorporacións a esta efeméride, a Deputación da Coruña liberaba onte catro imaxes de Rosalía interpretada polas deseñadoras Uqui Permui, Aurora Cascudo, Aldara Prado e Paula Mayor. Pola súa banda, a Associaçom Galega da Língua publicou a serie de vídeos Rosalía é mundial, no que se recollen dezaoito lecturas de textos da autora cos diferentes sotaques da lusofonía.