Ana Regueira, presidenta da Aula Castelao de Filosofía, presentaba onte en Pontevedra a trixésimo terceira edición deste encontro, que se desenvolverá co lema Filosofía e política. O Teatro Principal da Cidade do Lérez acollerá entre o 28 de marzo e o 1 de abril vindeiros os relatorios arredor destas cuestións. Segundo adiantaba Regueira, con esta edición preténdese "analizar cales son os grandes problemas políticos, como discutilos e como empezar a articular formas novas de discurso que non caian na vacuidad" nun momento no que o "accidental marca os discursos políticos e o que é fundamental non os marca".
Como adianto do programa, na presentación avanzouse que María Xosé Agra, catedrática de Filosofía Política da Universidade de Santiago, dará conferencia inaugural sobre política e vulnerabilidade. Tamén se confirmou a presenza Ricardo García Zaldívar, presidente de ATTAC España, que falará sobre o tratado transatlántico de libre comercio e investimento entre a Unión Europea e Estados Unidos(TTIP).
