Monicreques, teatro de obxectos e técnicas de narración oral mestúranse en A viaxe de Rosalía. Larraitz Urruzola leva a escena unha selección de textos da poeta de Padrón e mais fragmentos da súa vida nun espectáculo orientado a maiores de seis anos. A Secretaría Xeral de Política Lingüística anunciaba esta mañá que a montaxe fará parte do programa FalaRedes deste ano e visitará un total de trece concellos do país ata o vindeiro mes de maio. O concello coruñés de Frades acollerá o vindeiro 5 de marzo a primeira parada do espectáculo. Antes, a montaxe visitará diferentes localidades no marco das actividades do Día de Rosalía, que se conememora este 24 de febreiro.
