A Secretaría Xeral de Política Lingüística presentaba esta mañá a nova xeira do programa FalaRedes, que desenvolve actividades de dinamización lingüística en diferentes concellos do país. Como primeiro espectáculo da actual edición, o secretario xeral, Valentín García, presentou a xira do espectáculo A galiña azul, co que este programa quere homenaxear a Carlos Casares, escritor recoñecido do Día das Letras Galegas 2017. Ubú Teatro corre coa adaptación escénica deste libro de relatos, pensada para un público familiar de entre 6 e 10 anos e que mestura técnicas de narración oral, manipulación de monicreques ou clown.
Un total de 21 concellos recibirán a visita deste espectáculo nun percurso que comezou o pasado 3 de marzo en Valga e que rematará o vindeiro 12 de abril en Cangas. O espectáculo comprende cinco historias que abordan temas como a "a defensa da diversidade lingüística, a importancia das diferenzas ou a liberdade de expresión", segundo explican desde a organización do programa, e ao final de cada sesión o asistentes recibirán un exemplar do libro homónimo de Casares.
