Multiplícanse as actividades para conmemorar o Día de Rosalía

A celebración do Día de Rosalía, que conmemora cada 24 de marzo o nacemento da poeta, concita un crecente interese. De cara á presente edición, a Deputación de Lugo presentaba onte o seu programa especial para esta data. Co lema Rosalía sempre viva, desenvolveranse unha serie actividades que inclúen a exposición Airiños, aires…Rosalía de fotografías de Xurxo Lobato, a representación de A viaxe de Rosalía, un acto literario-musical e mais diferentes obradoiros.

Pola súa banda a Asociación de Escritores en Lingua Galega, co lema #mobilizarosalía está a convocar a actos por todo o país xa desde datas previas á celebración. O acto central celebrarase xa o domingo 21 cunha homenaxe no Panteón de Galegos Ilustres antes a tumba da autora. Noutros lugares de Galicia programaranse obradoiros e lecturas públicas da autora, mentres para o ensino promóvese que os alumnos envíen postais e participen nun envío masivo do verso "Trocando en sonrisas / queixiñas e choros" a través das redes sociais.

Desde a Fundación Rosalía anuncian para este sábado 20 o comezo das súas actividades para a conmemoración cun concerto de Canto D’Aqui e unha conferencia sobre a relación de Galicia e Portugal. Para o día 26 multiplícanse as propostas cunha Alborada e ofrenda floral en Compostela, outro acto en Padrón e un concerto de Xardín Desordenado na vila do Sar. Para o día 25 as actividades chegan ata Braga, onde Anxo Angueira participará nun Coloquio sobre Rosalía, Portugal e Galicia e asistirá a unha actuación de Roi Casal.