Sarria acollerá a primeira mostra dedicada ao Novo Cinema Galego

Pendente aínda de fechar o seu programa, Sarria acollerá entre os vindeiros 26 e 28 de febreiro a primeira mostra audiovisual que se organiza no noso país dedicada integramente ao Novo Cinema Galego. Alberte Branco coordina a I Escolma de Cinema Galego, un proxecto que nace da man da concellaría de Cultura co apoio da Deputación e que pretende visibilizar unhas creacións que a miúdo fican fóra dos circuítos de distribución convencionais. Ademais de proxeccións, o evento prevé programar mesas redondas e actividades paralelas.