Integrar a documentación dixital que xera a Administración ao tempo que custodia documentos históricos dos arquivos galegos. Estes son os dous grandes obxectivos cos que nace o Arquivo Dixital Integrado, un proxecto que será unha realidade ao longo deste mesmo ano, segundo anunciaba onte a Xunta de Galicia. Por unha banda, no marco do Arquivo Electrónico Administrativo permitirá "xestionar e conservar con todas as garantías de seguridade e dispoñibilidade a documentación dixital durante todo o ciclo de vida administrativa". Pola outra, e como Arquivo Electrónico Patrimonial "conterá máis de 275.000 documentos dixitalizados procedentes dos Arquivos do Reino de Galicia, do Histórico Provincial de Ourense e do Concello de Tui". A previsión da Xunta é que estes fondos históricos sexan accesibles desde o Portal de Difusión do Patrimonio Documental de Galicia no primeiro trimestre de 2016.
