"Unha reflexión, oxalá que poida ser tamén debate, sobre a creación artística na Galicia de hoxe dende diversas perspectivas: a creación e a produción, mais tamén a difusión, a comunicación e, acaso de xeito especial, as distintas formas de organización (mesmo institucional) que a creación artística presenta nos nosos días, dende o política de museos e os departamentos universitarios á crítica especializada". Esta é a perspectiva coa que se presenta o número 208 da revista Grial. A publicación de Galaxia foi nesta ocasión coordinada por Agar Lego, e inclúe artigos de autores como Manuel Segade, Natalia Poncela, Chus Martínez ou Suso Fandiño entre outros. Ademais, na sección Documentos preséntase unha escolma da correspondencia entre Ramón Piñeiro e Marina Mayoral. No número tamén se pode atopar un artigo de Henrique Monteagudo sobre a estancia de Castelao en Bos Aires ou un texto de Xosé Manuel Dasilva sobre a recuperación do texto orixinal de La parranda, entre outros contidos.
