Falece Sabela Labraña, voz da lingua galega en Barcelona

Profesora da Universidade de Barcelona, doutora en lingüística e, durante anos, coordinadora do proxecto Galauda. A filóloga Sabela Labraña falecía na Cidade Condal este sábado, segundo recolle El Correo Gallego. A investigadora e autora de diferentes libros e material na nosa lingua coordinou o proxecto Galauda, que promovía a aprendizaxe da lingua e da literatura galega en centros de ensino secundario de Cataluña. Boa parte das súas investigacións estiveron centradas na análise da convivencia de linguas nun mesmo territorio, e entre outras cuestións abordou a lingua e a percepción da identidade dos cataláns de orixe galega. Ademais, realizou diferentes traballos arredor da fonética da nosa lingua. Labraña recibira o pasado mes de xuño unha homenaxe na Universidade de Barcelona con motivo da súa xubilación.