Un estudo sobre turismo gaña o Premio Paz Andrade de Economía

André Carrascal Incera e Melchor Fernández Fernández acaban de se facer co Premio de Investigación en Economía de Galicia Valentín Paz Andrade polo seu trballo Tourism and income distribution: evidence from a developed regional economy. Este artigo, que publicaron na revista Tourism Management analiza o impacto que ten a actividade turística na economía galega. Segundo os seus datos, en xeral este impacto é positivo no benestar da sociedade, pero os autores advirten que é máis relevante "para os grupos con maiores niveis de renda —propietarios do capital e traballo cualificado—, contribuíndo ao incremento da desigualdade". O premio está dotado con 2.000 euros, e o xurado fixo tamén unha mención ex-aequo dos traballo Políticas inclusivas de vivienda a través de la actuación municipal en la erradicación del chavolismo. El realojo del poblado de Culleredo, de Carmen Gago Cortés e Isabel Novo Corti e mais Human-ignited wildfire patterns and responses to policy shifts de M. I. Chas Amil, J. P. Prestemon, C. J. McClen e J. Touza.

O xurado do galardón estivo composto polo reitor da USC, Juan Viaño, a presidenta do Consello Económico e Social de Galicia, Corina Porro; o director do IDEGA, Xoaquín Fernández Leiceaga; o integrante do mesmo Instituto, Xoán Carmona Badía; Juan Gallego Fouz, en representación do Consello Económico-Social; os ex presidentes da Xunta de Galicia, Fernando González Laxe e Emilio Pérez Touriño; e o profesor da Universidade de Vigo, Alberto Gago Rodríguez.