Palco da música de Ourense
Hai xa cinco anos botaba a andar o proxecto Palcos da música. Esta iniciativa procuraba documentar, mediante traballo voluntario, as construcións deste tipo, presentes por todo o país e a miúdo pouco valoradas. Agora os seus promotores anuncian que acaban de chegar aos 100 palcos distribuídos pola nosa xeografía, con fotografías, descricións e mesmo datos históricos nalgúns casos. Segundo explican o arquitecto Xosé Ceferino Castro e mais o músico Félix Rodríguez, "chegados a este punto, o traballo de recompilación tennos proporcionado material suficiente como para estar realizando tamén artigos, colaboración na redacción de documentos para a conservación e proxectos de revitalización e dinamización de palcos da música". E é que, segundo aseguran, a finalidade ultima deste proxecto aberto a colaboracións é dinamizar e valorizar estes espazos con actividades culturais.
