Centro de Saúde de Monterroso
O estudio de arquitectura que forman Elizabeth Abalo e Gonzalo Alonso acaban de ver recoñecido o seu traballo co A.Prize, un dos máis importantes premios da disciplina que se outorgan a nivel europeo. O galardón, que se integra na Trienal de Milán e está dotado con 10.000 euros, valora o labor deste dúo de creadores no Centro de Saúde de Monterroso. O proxecto obtivo un aplauso unánime do xurado polo xeito no que se integra na estrutura da vila, o emprego de materiais e a aposta por unha arquitectura de escala humana. Ademais, o estudio conseguía tamén recentemente o premio NAN de arquitectura na categoría de interiorismo polo seu labor na rehabilitación da casa que acolle a Fundación Rubido Romero de Negreira.
