Hortas de Caramoniña, en Compostela
Tres proxectos de estudios galegos de arquitectura acaban de ser galardoados na XIII Bienal Española de Arquitectura e Urbanismo. O xurado seleccionou 22 proxectos entre os 449 presentados por amosar "actitudes diferentes no xeito de intervir sobre o patrimonio, a cidade e a paisaxe con solucións innovadoras e cualificadas". Entre estes atópase a Casa Chao que Juan Creus e Covadonga Carrasco deseñaron en Fisterra e que xa fora recoñecida cun premio Juana de Vega. Elizabeth Abalo e Gonzalo Alonso recibiron tamén un galardón polo seu traballo nas Hortas en Caramoniña (Compostela), o mesmo proxecto polo que levaran un premio Manuel Gómez Román. Finalmente, a rehabilitación de catro edificios para os Rexistros da Propiedad en Vigo feita por Jesús Irisarri Castro e Guadalupe Piñera Manso tamén mereceu a valoración do xurado.
