A Xunta presenta a Xacopedia

Unha enciclopedia en liña sobre o Camiño de Santiago e a cultura xacobea. Esta é a proposta da Xacopedia, iniciativa que presentaba onte a directora de Turismo de Galicia Nava Castro. A proposta, que polo momento só está dispoñible en castelán, recompila, segundo adianta o propio web, "todos os termos relacionados co fenómeno da peregrinación a Santiago, desde personaxes relacionados coa cultura xacobea ou peregrinos históricos ata tradicións, lugares míticos, os camiños e as súas poboacións". En total, máis de 3.000 entradas que se anuncian "en varios idiomas", preto de cen mapas e listaxes de asociacións xacobeas e de albergues en cada camiño. O web foi realizado pola editora compostelá Bolanda.