Talía Teatro desmonta os roles de xénero en Rosa Caramelo

Catro textos da autora italiana Adela Turín mestúranse no novo espectáculo de Talía Teatro. O Salón Teatro de Compostela acollía esta mañá a presentación de Rosa Caramelo e outras historias, un espectáculo que dirixe Paula Carballeira e na que o actor Artur Trillo estará acompañado en escena polo músico Fernando Fraga. O espectáculo parte da historia de Margarita unha elefanta que non se axeita á normalidade do seu grupo para desmontar roles e estereotipos de xénero e traballar para os máis novos "ideas impostas e simplificadas, pero fortemente asumidas, sobre actitudes e aptitudes das mulleres e dos homes."

A estrea da montaxe será este venres 3 de outubro no Salón Teatro de Santiago de Compostela, onde tamén se poderá ver o día 4. Boiro será a seguinte paraxe do espectáculo, o vindeiro día 23.