A Sociedade Española de Xenética entrega hoxe en Córdoba os Premios Nacionais de Xenética. Estes galardóns, considerados os máis importantes do seu campo a nivel estatal, recoñeceron este ano o traballo dun investigador galego. Ángel Carracedo, que desenvolve o seu labor no grupo de Medicina Xenómica da Universidade de Santiago fíxose co Premio Nacional na categoría de Aplicacións da Xenética. A Sociedade, en concreto, considera especialmente relevantes "o seu labor pioneiro no desenvolvemento de novas tecnoloxías para a identificación forense baseadas na xenética molecular" e lembra tamén "as súas contribucións á oncoloxía clínica e ao establecemento das bases moleculares de varias enfermidades mentais e vasculares".
O investigador suma unha destacada carreira de recoñecementos que inclúe a Medalla de Galicia, o premio Peña Novo ou o Nóvoa Santos entre moitos outros. O galardón que agora recibe está dotado con 4.000 euros.
