Unha serie de rutas, un web e unha aplicación darán a coñecer as posibilidades de turismo industrial da provincia da Coruña. A Deputación Provincial acaba de dar a coñecer esta iniciativa, na que participan un total de 68 empresas de ámbitos como a alimentación, o sector agrogandeiro, o mar, a artesanía ou mesmo a enerxía. No marco do proxecto ofertaranse paquetes turísticos e rutas temáticas a partir dos eixes Natureza e Enerxía, Construíndo o cotián, O Mar e os seus oficios, Reinventando a alimentación e Camiños de terra e auga. Os interesados en coñecer este patrimonio teñen un web e mais unha aplicación para dispositivos móbiles ao seu dispor.
