"O labor, o impulso e a constante traxectoria que solidifican no traballo asociativo e colaborativo" de Escena Galega levaron aos organizadores da Mostra Internacional de Teatro de Ribadavia a homenaxear este colectivo. Deste xeito, outorgáronlle o Premio de Honra Roberto Vidal Bolaño, que recoñece anualmente o traballo a prol do teatro galego. Segundo os responsables da mostra, Escena Galega é " unha das institucións que mellor evidencian o desexo de sumar esforzos cara o progreso e o ben común do sistema teatral galego" e apunta que "a recente confluencia dun amplo número de compañías como novas integrantes desta plataforma, que a dota de meirande forza e lexitimidade, é un feito que non nos pode pasar desapercibido, pois amosa a vontade de non resignación e de xuntanza para tentar conquistar as demandas e cambios xustos e necesarios daquelas cuestións que atinxen directamente aos creadores, usuarios e mediadores no terreo das artes escénicas". O premio entregarase o vindeiro 18 de xullo a coincidir coa inauguración da mostra.
