Manuel María protagonizará o vindeiro Día das Letras

Con ampla maioría, e logo dunha segunda volta que o enfrontou a Carvalho Calero, Manuel María foi escolleito como persoeiro a homenaxear no vindeiro Día das Letras. O plenario da Real Academia Galega celebrou o sábado a dilatada elección, na que o poeta de Outeiro de Rei competía tamén con Xela Arias. Finalmente, unha ampla maioría refrendou uun autor que a RAG sinala como "dunha extensa obra e expoñente do activismo político, representa a conciencia e o compromiso inquebrantable coa lingua galega". O presidente da institución, Xesús Alonso Montero, sinalou que a elección "vai ser un triunfo para a Academia e para a normalización", segundo recolle Sermos Galiza.

Diferentes asociacións como A Mesa pola Normalización, A Asociación Socio-Pedagóxica Galega ou a Asociación de Escritores, coas que o poeta colaborou intensamente, xa anunciaron o seu apoio á resolución da RAG e auguran un ano cheo de actividades. Margarida Ledo, Darío Xohán Cabana á esquerda, Fina Casalderrey, Víctor Freixanes, Xosé Luís Regueira e Manuel Rivas foron os académicos que fixeron a proposta pola que finalmente se decantou a Academia.

Nado en Outeiro de Rei o 6 de outubro de 1929 e finado en 2004, a inxente actividade do autor inclúe a cración da libraría e mais da editorial Xistral ou da colección Val de Lemos ademais de múltiples colaboracións con diferentes colectivos e movementos sociais. Poemarios como Muiñeiro de brétemas, Morrendo a cada intre, Mar Maior ou A primavera de Venus ademais de incursións na narrativa, o teatro ou o ensaio presentan un creador fondamente comprometido co país e coa lingua.