Eva Veiga gaña o Premio de Poesía Cidade de Ourense

O ano 2015 está a ser de galardóns para Eva Veiga. A autora, que se fixo o pasado mes de maio co Premio de poesía Concello de Carral, acaba de sumar ao seu palmarés o Premio de Poesía Cidade de Ourense. Silencio percutido é o título da obra coa que se impuxo aos 46 títulos presentados á trixésimo primeira edición do certame. Na súa elección por unanimidade os membros do xurado valoraron "a intensidade dun discurso lírico que incorpora, dentro dunha poética do silencio, matices de fonda reflexión e sensorialidade, mantendo en todo momento un exercicio de linguaxe e depuración expresiva".

O xurado do galardón estivo composto por Irene Veiga, Miguel Anxo Fernán Vello, Edelmiro Vázquez Naval, Rochi Nóvoa e Xavier Rodríguez Baixeiras. A técnica municipal de normalización lingüística, Mónica Fernández Valencia, actuou como secretaria e o concelleiro de Cultura, Francisco González Bouzán, foi o presidente. Veiga recibirá 6.000 euros en metálico e verá súa obra publicada.