A Mostra de Teatro de Ribadavia aposta pola hibridación de linguaxes, xéneros e disciplinas

O cruce da danza co cine e a pintura que propón La Veronal, videoproxeccións e manipulación de vídeo en tempo real, feita pola Agrupación Sr. Serrano, Circo con teatro de obxectos a cargo da compañía La Güasa, ou un terrario no cal se poden observar os artistas (Vivarium) son algunhas das propostas híbridas da edición 2015 da Mostra Internacional de Teatro de Ribadavia, e que se celebrará nesta vila ourensá do 18 ao 25 de xullo. Para Roberto Pascual, director da MIT, "o risco ten que ser un dos deberes principais da dirección artística dun festival teatral, e maniféstase na vontade de favorecer o acceso ao teatro a todos os públicos, sen prexuízos".