7 puntos sobre a nova Lei de Patrimonio Cultural

A Consellería de Cultura presentaba hoxe á mañá o anteproxecto da nova Lei de Patrimonio Cultural, un agardado texto legal que agora disporá dun mes para a súa apreciación pública e o envío de alegacións. Segundo o Conselleiro de Cultura, as claves da nova lei son a “simplificación normativa” que outorgue maior “seguridade xurídica” aos cidadáns sen rebaixar o nivel de protección dos bens. Tamén incidiron no que sen dúbida será o aspecto máis polémico: a habilitación legal aos concellos para exerceren competencias en urbanismo nalgúns tipos de bens.

O conselleiro de Cultura referiuse hoxe á mañá á nova Lei de Patrimonio coma unha “Lei de País”. As claves do departamento autonómico en relación ao novo anteproxecto de Lei erá a “simplificación normativa” orientada a facer máis eficiente a xestión da administración, unha “maior seguridade xurídica” para a cidadanía e unha adaptación “aos tempos” da realidade patrimonial. Agora queda aínda un longo periplo para o texto, que aínda será remitido a diferentes entidades ata que, a finais de ano, a Xunta ratifique o texto e o remita ao Parlamento.
Aquí te situamos en dez puntos os cambios da Lei de Patrimonio Cultural.

1. Simplificación lexislativa. Na nova lei refúndense diferentes normativas para facilitar a xestión legal dos bens e do seu contexto. En concreto, deroga as leis do Patrimonio Cultural, de Protección dos Camiños de Santiago e a de traballos de dotación artística nas obras públicas e nos Camiños de Santiago.
2.As diferentes tipoloxías de bens culturais pasan a ser únicamente dúas: os Bens de Interese Cultural (que xa figuraban como tales) e os Bens Catalogados, que eran os que figuraban no Inventario Xeral do Patrimonio. Na práctica é establecer dous niveis de protección diferentes para os bens.
3.O anteproxecto de Lei propón un Censo de Bens Culturais, concebido como un instrumento de divulgación coa finalidade de “converterse nunha ferramenta prospectiva para a protección do patrimonio cultural”. Ademáis, a lei quere sistematizar o contido dos catálogos urbanísticos.
4. A principal novidade da lei é que establece a posibilidade de habilitación legal para que os Concellos poidan autorizar intervencións en determinados tipos de ben catalogados. Segundo a Xunta, esta decisión realízase para acelerar os procesos de tramitación. A Consellería resérvase algúns tipos de bens sobre os que só ela pode dar autorización: os BICs, patrimonio artístico, patrimonio arqueolóxico, os de titularidade da Igrexa. Os concellos deberán voluntariamente querer asumir esta competencia, deberán dispor dun equipo técnico e estarán monitorizados pola Consellería de diversas maneiras.
5. Regúlanse novos patrimonios, coma o inmaterial, o artístico, o arquitectónico, a arquitectura moderna, edificacións de indicanos ou a Enxeñaría histórica anterior a 1901. Todos os hórreos, petos e cruceiros anteriores a 1901 son declarados BIC. Tamén o patrimonio subacuático, en todos os pecios anteriores a 1901 e no patrimonio industrial anterior a 1936. Incorpórase tamén o patrimonio científico e técnico, e revísanse outros tipos de patrimonio, como o documental, o bibliográfico ou o museolóxico.
6. A Lei contempla a posibilidade de beneficios fiscais para os BICS e a regulación do patrocinio cultural, se ben estes aspectos dependen doutras leis aínda non executadas.
7. A Xunta dáse a si mesma varios prazos en función da aprobación da lei. 2 anos para divulgar a relación de BICSs e Catalogados, así como a publicación do Censo de Bens Culturais, e cinco anos para dientificar e concretar os BICs ex lege, é dicir, aqueles que crea por defecto a propia lei.