Falece María do Carme Kruckenberg

Aos 88 anos e na véspera do Día das Letras, falecía esta fin de semana María do Carme Kruckenberg. Coñecida literariamente pola súa produción poética, Kruckenberg desempeñou tamén un importante labor no campo do activismo feminista. Recentemente a editorial Galaxia recollía o seu periplo biográfico na obra Vivir, unha aventura irrepetíbel de Mercedes Queixas Zas.

O tanatorio de Pereiró, en Vigo acolleu onte un acto relixioso e outro cívico no que se despediu esta figura das nosas letras. O traballo da autora valeulle, entre outros recoñecementos ser nomeada socia de honor da Asociación de Escritoras en Lingua Galega, a Medalla de Galiza, a Medalla Castelao ou o Premio Laxeiro.