O poeta Ismael Ramos Castelo gaña con Os fillos da fame a XVIII edición do premio Johán Carballeira de Poesía. O xurado, composto polos escritores Ramón Blanco, María do Carme Caramés e Luís Valle , destacaron a calidade literaria da obra que a sitúan na "mellor tradición da poesía internacional". Con vinte anos, o poeta, que gañou xa outros certames literarios, recibirá un premio en metálico de 1.500 euros e a súa obra será publicada por Edicións Xerais.
Nesta edición do certame, que convoca o Concello de Bueu, presentáronse un total de 33 poemarios e, por unanimidade, o xurado decidiu escoller a obra de Ismael Ramos Castelo como gañadora porque "non esquece a riqueza da lírica galega e conta cunha voz autorial limpa e novidosa".
Ismael Ramos (Mazaricos, 1994) comezou a escribir aos 16 anos, e xa gañou dúas modalidades do Premio Minerva, poesía e narrativa ademais do segundo premio do Ánxel Casal.
