O Diario Oficial de Galicia publica hoxe a convocatoria das subvencións ás entidades locais de Galicia para a promoción do uso da lingua galega. Desta volta, a Xunta destina un total de 245.000 euros a esta partida fronte aos 300.000 que dedicara o ano pasado. O recorte continúa unha liña que vén desde 2012, cando esta mesma finalidade contaba con 520.000 euros anuais de orzamento.
Os fondos, destinados a concellos con máis de 3.000 habitantes, poderán dedicarse á creación, mantemento ou reforzamento de servizos lingüísticos, así como a promover programas de dinamización da nosa lingua. As entidades interesadas en acceder a esta liña de subvencións teñen un prazo dun mes a partir de mañá para facer a súa solicitude.
