Tal e como se adiantara na presentación dos orzamentos da Xunta para 2014, as subvencións para a edición de recursos didácticos en lingua galega para niveis de ensino non universitario seguen a caer. O Diario Oficial de Galicia publica hoxe a convocatoria de axudas para este fin cunha dotación total de 150.000 euros, o que supón unha mingua de 50.000 euros a respecto do pasado ano e continúa a tendencia decrecente desta partida.
A convocatoria, que se iniciou en 2008 cuns fondos de 1,05 millóns de euros veu desde entón diminuíndo a súa contía, pasando polos 400.000 euros de 2010 e ata a actual cifra. Editores, escritores e Asociación de Literatura Infantil e Xuvenil denunciaran recentemente nun manifesto a pegada que este recorte ten sobre o sector do libro galego.
