Importante caída dos medios en papel en Galicia

O Estudo Xeral de Medios (EXM) publicou os primeiros datos de consumo de medios en 2015 e a consultora Avante fixo un desglose para os medios galegos que constata unha caída xeneralizada da prensa e a subida doutro tipo de medios. En concreto, os medios en papel caeron nestes primeiros meses de 2015 de xeito notable (os diarios, máis dun 7%, as revistas un 2,75% e os suplementos perden un 14%. Os únicos medios que suben (e non demasiado) son a televisión, Internet, exterior e o cine.

Nas radios, Cadena Dial gaña 46.000 oíntes e Radio Voz 34.000. As que rexistran perdas de oíntes están encabezadas pola Cadena 40(-54.000 oíntes), a Cadena Ser (-35.000 oíntes) e Europa FM (-31.000).

No ámbito da prensa, as caídas son case dramáticas. La Voz de Galicia perde 29.000 lectores, Faro de Vigo 22.000, o Marca 41.000 e El País 34.000. Só o Diario de Pontevedra e Sport suben, con 4.000 e 3.000 lectores respectivamente.