Logo da estrea o pasado outono no FITO de Ourense, Matarile Teatro leva a súa última produción, Hombres Bisagra de xira. O Alt de Vigo acolle o vindeiro 14 de marzo nova representación deste proxecto, coordinado por Ana Vallés e Baltasar Patiño. Posteriormente, a obra poderá verse no Teatro Principal de Santiago entre os días 24 e 27 de marzo deste ano. Hombres bisagra xorde dunha proposta conxunta de Patiño e do percusionista Nacho Sanz e propón unha representación achegada a un concerto no que catro homes interactúan sobre as táboas ao ritmo de sintetizadores da primeira época da electrónica e nun contorno de escenarios cambiantes.
