Preocupada polos recentes datos que confirman un retroceso no emprego da nosa lingua, a Real Academia Galega acaba de facer pública unha declaración institucional encol desta cuestión. Así, a RAG apunta dez accións ao seu ver necesarias para recuperar o galego, entre elas, reclama o cumprimento do Plan Xeral de Normalización Lingüística, medidas de apoio para a facilitar a transmisión interxeracional ou que se esixa o coñecemento da lingua para acceder á función pública.
Ademais, a institución fai un chamamento a familias e individuos para que empreguen o galego, e salienta asimesmo que "urxe unha reflexión seria, cómpre un novo impulso para evitar o desafiuzamento do galego da súa propia casa, Galicia. Un marco normativo máis axeitado, pero sobre todo, un discurso renovado, positivo e proactivo", no que, segundo lembra, é papel da Xunta de Galicia "tomar a iniciativa e liderar o esforzo social para seguirmos avanzando".
